Приземје

Прв кат

На територијата на нашата држава се пронајдени многубројни фосилни остатоци што сведочат за живиот свет кој ги населувал овие простори во текот на геолошкото минато. Меѓу нив се остатоци од корали, полжави, школки, амонити и други безрбетници од некогашните мориња, кои датираат од креда и олигоцен.

Од особено значење се наодите на пикермиската фауна од доцен миоцен, чија старост се проценува на околу 8 до 10 милиони години. Во изложбата се претставени добро зачувани фосилни остатоци од животни што биле дел од оваа заедница, меѓу кои мастодонти, носорози, диви свињи, хипариони, газели и антилопи.

Во витрините можат да се видат оклоп од желка со значително поголеми димензии од денешните желки, череп од сабјест тигар, череп од мајмун, како и бивни, черепи и вилици од различни видови мастодонти. Изложени се и черепи од носорози, черепи и метаподии од хипариони, како и метаподии од фосилна жирафа.

Посебен дел од изложбата е посветен на фосилите од плеистоцен. Претставени се многубројни фосилни остатоци од пештерски мечки, како и профили на фосилоносните слоеви од пештерите во кои биле пронајдени. 

Дел од изложените примероци потекнуваат од значајни фосилни наоѓалишта во околината на Велес, Неготино, Кавадарци и Валандово, кои имаат особено значење за науката.