Приземје

Прв кат

Ekspozita entomologjike u mundëson vizitorëve të njihen me përfaqësuesit e rendeve më të rëndësishme të insekteve.

Në pjesën hyrëse paraqiten anatomia, morfologjia dhe biologjia e insekteve, me theks të veçantë te metamorfoza – procesi i shndërrimit nëpër të cilin kalojnë gjatë zhvillimit të tyre. Më tej, vizitorët mund të shohin insekte të ekspozuara veçmas ose në diorama të vogla, të cilat i paraqesin në habitatet e tyre natyrore.

Ndër grupet e ekspozuara përfshihen përfaqësues të karkalecave dhe insekteve të rendit Hemiptera. Në pjesën qendrore të ekspozitës janë vendosur tri diorama të mëdha. Ato paraqesin një mjedis pyjor me një fole milingonash, një invazion karkalecash dhe një pjesë të brezit bregdetar të Liqenit të Prespës me lloje të ndryshme pilivesash.

Në disa diorama të vogla paraqiten brumbujt dhe fluturat, ndër të cilat edhe disa nga llojet më të mëdha që gjenden në vendin tonë. Vëmendje të veçantë tërheqin flutura Apollon, karakteristike për zonat e larta malore, dhe flutura bishtdallëndyshe, një nga fluturat ditore më të mëdha dhe më mbresëlënëse në vendin tonë. Përveç fluturave ditore, janë ekspozuar edhe flutura nate, ndër të cilat edhe pavoni i natës – flutura më e madhe në Evropë.

Përveç përfaqësuesve të faunës autoktone, në ekspozitë mund të shihen edhe lloje ekzotike insektesh që vijnë nga rajonet tropikale dhe subtropikale.